Gedicht zum Eninger Schulhausneubau 1914

Übersetzt haben wir ein in deutscher Schrift verfasstes schwäbisches Mundart-Gedicht. Einen  Teil des Originals zeigt die Abbildung unten.  Das Original wird Frida Krieg zugeschrieben.

Zum Eninger Schulhausbau

Richtfest am 19. Juni 1914.

1.)

"Wer will bauen an der Straßen

muss die Leute reden lassen"

Wenn erst baut a ganze G´meind

do sitzt älles volla Feind.

----

2.)

Des kommt teuer! schreit der Michel

100 000 - meiner Sichel

d´Herra uffem Rathaus seant

das mer us no all verpfändt!

----

3.)

Wer wurd no dia Stuier zahla?

Noi, hia braucht mer et so z´prahla.

S´Schulhaus hätt´s jo lang no dau -

´s stoht fast 100 Jahr jetzt schau.

----

4.)

Was send mir für Kerle worra,

G´scheid u. stark & g´sond wia d´Mohra.

Mo´s recht staubet, stenkt u. schreit

do geits erst die rechte Leut!!

----

5.)

Älles wurd jetzt schöner, feiner

Aber d´Lomperei kommt einer

Guck dr so en Lümmel a

- bist koi Bua & bist koi Ma.

----

6.)

Tropfa sends & miserabel

nemma sotts mas äll uf d Gabel-

Trenka, tanza, turna, raucha,

sonst nix toa als s´Geld verbraucha.

----

7.)

D´Mädla, dia send au vom Teufel-

wia sind dia so grausig eitel -

Rucksäck, Lackschuh, Hut & Broscha

und könnet koi Suppa kocha.

----

8.)

Frieder, guck, so ist heut d Jugend-

hot koi Zucht & hot koi Tugend-

Und für so a böse Bloß

Goht dui Bauerei hia los?!

----

9.)

Und der Frieder, der hot g´sait:

Narr, ih haus au überlait

´s ist halt hia wia anderswo

wemmer et will, no muaß mer jo!

----

10.)

Weaga de Lehrer isch jo net -

do tät ich au etwas stät.

die hent´s z´guat u. zwenig Stonde

Ihr Verdienst ischt jo wia g´fonda.

----

11.)

Aber ema nuia Haus

Sieht doch älles anders aus.

Bua u. Mädle muaß mer scheida

Jedes muaß mer b´sonders woida!

----

12.)

Send doch wahrlich onsre Kender

Koine Farra, Goißa, Render-

drom, so will ih baua lau,

Wenn´s reacht wurd, mei Freud dra hau!

----

13.)

Wia soll des de Kender schada,

Wenn se könnet warm gau bade.

Sieh` so kommt der Fortschritt jetzt

Enenga ischt au et letzt!

----

14.)

Also bauet Schula, Stroßa

und teant et uf d Geizhäls losne

Und wenns alte Schulhaus brennt-

No net gar so fürchtig grennt.

----

15.)

S´ganz Nui muaß mer in die Höhe

daß mers tät von weitem seha-

Wie a Schloß muaß droba stau

Älles sollt sei Freud dra hau.

----

16.)

Für heut wölla mer no warta,

Wia´s no geht mit sellem Garta,

ob ma Platz zur Stroß au kriagt

oder ob ma´ß auße ziagt.

----

17.)

Seht, ihr fleiß´ge Handwerksleut,

bis zom Ei (n)ziah isch no weit

Machet uier Sach voll guat

das jo nex passiera tuat.

----

18.)

Fest stau soll des Haus em Wetter

Loba soll es Bas & Vetter

Reaga, Donner, Sturm u. Beba

älle mög es überleba!

----

19.)

Nun, ihr Leut von Axt & Kelle

Hebet uire Gläser älle

Stoßet a & stimmet bei,

daß mei Wunsch der eure sei.

-------

En. den 18. Juni 1914

 weckh/Übersetzung: PWeckherlin/Foto: Archiv HGV Eningen.